chocolate cake ....... بالصور مجربه وجميله جدا

إزيكم يا أحلى قمرات
بتحبوا الــــــــ chocolate cake ؟؟؟


أنا عندي ليها هنا طريقة حلوة
جربوها وان شاء الله مش هتندموا أبداً


بسم الله الرحمن الرحيم


المقادير


أولاً صوص الشيكولاتة

قبل أي حاجة لازم نعمل صوص الشيكولاتة وهو كالتالي:

مج كاكاو خام ( من عند العطار )
مج لبن بارد
مج زيت
مج سكر ( ممكن مج ونصف حسب الرغبة )
كيس فانيليا


[ندعوك للتسجيل في المنتدى أو التعريف بنفسك لمعاينة هذه الصورة]


بعد كده نضربهم مع بعض كويس أوي في الخلاط
بعد مايتجانس الخليط هناخد منه مج واحد بس ونحطه في الفريزر على ما نجهز الكيك


مقادير الكيك


5 بيضات
كيس فانيليا
كيس بيكينج باودر
2 كوب دقيق
1 كوب سكر
باقي صوص الشيكولاتة
3 ملاعق سمنة أو زبدة سايحة
( ملحوظة: أغلب الناس بيحطوا بدل السمنة زيت علشان بتكون خفيفة اكتر لكن انا بحب أحطلها سمنه بقري علشان طعمها بيكون أجمل )


الطريقة


نضرب البيض مع الفانيليا كويس اوي على السرعة الهادية وبعدين بنزود السرعة تدريجياً
بعد كده بنضيف السكر بالتدريج لحد مايكون عامل معانا زي الكريمة
ننزل على الخليط ده بالسمنة وبعد كده الكمية المتبقية من صوص الشيكولاتة
بعد كده بننزل عليه الدقيق والبيكنج باودر( ولو لقيتي الكيكة مش مدياكي القوام اللي انتي متعودة عليه وبتحبية ممكن تزودي الدقيق شوية )
ادهني الصينية بالزبدة ورشي عليها الدقيق وصبي عليها الكيكة


[ندعوك للتسجيل في المنتدى أو التعريف بنفسك لمعاينة هذه الصورة]


دخليها الفرن وتكوني مسخناه من قبلها وتسيبيه على أعلى درجة حرارة عندك لمدة عشر دقائق وبعد كده تهدي عليها النار


[ندعوك للتسجيل في المنتدى أو التعريف بنفسك لمعاينة هذه الصورة]


ودي صورتها بعد مااستوت
بعد كده بطلع مج الصوص من الفريزر


[ندعوك للتسجيل في المنتدى أو التعريف بنفسك لمعاينة هذه الصورة]


بقطع الحروف والأجناب والوش بتاع الكيك علشان تشرب الصوص ومايكونوش ناشفين


[ندعوك للتسجيل في المنتدى أو التعريف بنفسك لمعاينة هذه الصورة]


هي طبعاً فرولت معايا علشان انا قطعتها وعملت كل حاجة وهي لسة سخنة مولعة
والبركة في زوجي العزيز ( معندوش صبرللكيكة دي بالذات ) هو ومريومة حبيبتي طبعاً
فنصيحة مني ليكي ماتقطعيهاش غير لما تهدى شوية
بعد كده نقسمها لقسمين وتدهنيها بالصوص


[ندعوك للتسجيل في المنتدى أو التعريف بنفسك لمعاينة هذه الصورة]


( على فكرة الصوص ده مابيتصبش ده بيكون تقيل وانتي بتدهنيه على الكيكة )بالمعلقة
بعد كده نحط النصف التاني من الكيك


[ندعوك للتسجيل في المنتدى أو التعريف بنفسك لمعاينة هذه الصورة]


بعد كده بتقطعيها مستطيلات زي الجاتو


[ندعوك للتسجيل في المنتدى أو التعريف بنفسك لمعاينة هذه الصورة]


ممكن تسيبيها كده وممكن تزوقيها طبعاً انتي وذوقك
أنا سبتها كده لأني بحب الــ chocolate cake كده بطبيعتها بدون إضافات
بس ساعات بطحن مع صوص الشيكولاتة بندق وممكن أحط فوق كل واحدة لوزة أو واحدة عين جمل


[ندعوك للتسجيل في المنتدى أو التعريف بنفسك لمعاينة هذه الصورة]


دي بعد ما خلصت وبردت إيه رأيكم بقا؟؟


[ندعوك للتسجيل في المنتدى أو التعريف بنفسك لمعاينة هذه الصورة]


ودي لأول واحدة هترد عليا
وبالهنا والشفا
مستنية ردودكم
والدعاء لي بظهر الغيب

مشكور الله يعطيك العافية